Mældur úr launsátri!

Þokkalegt bréf sem beið manns í póstinum í dag, nokkurra þúsunda króna sekt frá löggunni á Snæfellsnesi fyrir meintan hraðakstur í Hvalfjarðarsveit í síðustu viku. Á að hafa verið mældur á 96 km hraða, þar sem leyfilegur hámarkshraði er 90 km. Rekur ekki minni til að hafa mætt lögreglubíl á þeim slóðum, og hvað þá að vera stöðvaður, og mun krefja embættið svara! Einn vinnufélagi minn fullyrðir að búið sé að setja þarna upp hraðamyndavél, og ef svo er þá er hún þokkalega vel falin. Ef ég man rétt var umferðin þarna töluverð og á jöfnum hraða, og hafi maður verið mældur af myndavél, þá er ekki mikið samræmi milli slíkra tækja og "lifandi" lögregluþjóna sem eru ekki að hafa fyrir því að stöðva menn og sekta fyrir að vera á innan við 100 km hraða við góðar aðstæður. Í sömu ferð mætti ég amk tveimur lögreglubílum á svipuðum hraða sem ekki svo mikið sem blikkuðu á mann. Nær væri að elta uppi ökuníðingana sem vaða framúr heilu bílalestunum á 120-140 km hraða, og láta sig litlu varða þó blindhæðir séu framundan.

Þetta er óréttlæti sem verður mótmælt!

Innistæðulítil vegabréf

Var á faraldsfæti um helgina (sem fyrr í sumar og dekkin á Skódanum farin að finna fyrir því). Eitt af því sem hefur verið meðferðis, að kröfu krakkanna, eru vegabréf frá N1 og stimpilkort frá Olís, kallað Ævintýraeyjan. Allt til að safna einhverjum smá vinningum, sælgæti og smáhlutum. Um leið græða olíufélögin á manni með gylliboðum sem ætlað er að lokka börnin á bensínstöðvarnar. Ævintýraeyjan var efst á vinsældalistanum fyrr í sumar, og fljótt var búið að fylla út nógu mörg kort til að allir fengju eitthvað fyrir sinn snúð. Síðan tóku við vegabréf frá N1, en erfiðlega hefur gengið að safna stimplum á þau kort. Vinningarnir hafa oftar en ekki verið uppurnir og starfsfólkið klórað sér í höfðinu yfir því hvað gera ætti í stöðunni. Í veitingaskálanum í Brú kvartaði starfsstúlka undan því að þau fengju svo lítið af þessum vinningum, ,,að ég veit ekki hvað þessir menn eru að hugsa" eins og hún orðaði það með pirring í röddinni.

Á mínum bær hefur það amk verið niðurstaðan hjá krökkunum að Ævintýraeyja Olís hafi verið miklu betri en Vegabréfin hjá N1, vörurnar voru þó til og vinningarnir voru fleiri og meira í þá lagt. Verst er þó að láta þessa ísmeygilegu markaðssetningu ná tökum á fjölskyldunni. Á meðan hækka félögin bara bensínverðið með bros á vör....

Góð helgi eyðilögð

Það er ekki tekið út með sældinni að vera dómari í enska boltanum en vælandi blámenn í Chelsea settu það mikinn þrýsting á Robbie þennan Styles að hann eyðilagði fyrir manni annars frábæra helgi. Allur umheimurinn sá að þessi vítaspyrnudómur var gjörsamlega kolklikkaður og greinilegt var að dómarinn uppgötvaði það eftirá, hann fór bókstaflega á taugum og missti leikinn úr höndum sér og vörum. Það var hreinn stuldur að blámennirnir hirtu eitt stig frá þessum leik, Liverpool var á góðri leið með að bæta við öðru marki þegar ósköpin dundu yfir.

Ekki að undra að forráðamenn ensku úrvalsdeildarinnar séu búnir að gefa Styles leyfi. Hann á amk ekki afturkvæmt á Anfield, svo mikið er víst.

Steven Gerrard: Viðurkenndu mistökin

Raddir sem mega ekki þagna

Íhaldsemin í manni sér til þess að kveikja alltaf á 9-fréttum RÚV á morgnanna til að hlusta á Bjarna Fel flytja íþróttafréttir. Hann klikkar ekki rauðbirkni KR-ingurinn og ætti að vera í loftinu sem oftast. Verst er að missa hann af skjánum með enska boltann, eitthvað svo heimilislegt að hlusta á hann lýsa mörkunum líkt og allt sé í beinni útsendingu. Þeir félagar á Sýn2 ættu að sjá sóma sinn að fá Bjarna til sín, eða heimila RÚV að sýna mörkin einu sinni í viku, líkt og Skjárinn samdi við Sjónvarpið í fyrra.

FLeiri útvarpsraddir má nefna, m.a. Sigurð G. Tómasson og Gissur Sigurðsson. Eðalsútvarpsmenn og lagið sem Sigurður leikur í upphafi hvers þáttar á Sögu er algjör klassík. Vals með rússnesku ívafi sem fær mann alltaf til að slá taktinn og raula með. Um mann fer nettur hrollur við að hlusta á Gissur, vonandi fer hann að koma úr fríi sem fyrst.

Voronin lofar góðu

Kominn tími til að tjá sig eitthvað um sitt lið. Það lofar góðu fyrir komandi tímabil og sér í lagi þessi Voronin, hörkuduglegur og tekniskur, með gott auga fyrir spili. Benitez kominn með töffaralega greiðslu og skegg og léttur bragur yfir mannskapnum. Sá nú reyndar lítið af leiknum í dag en eitt mark á útivelli ætti að duga fyrir seinni leikinn á Anfield.

Nú fer söngur að heyrast á heimilinu um nýjan Liverpool-búning. Ungur og efnilegur Púllari hreyfst svo af Gonzales á sínum tíma að hann lét þrykkja nafn hans á búninginn. Eftir það komst sá ágæti leikmaður varla í liðið, og ku vera horfinn úr herbúðum Liverpool. Það er þó til einn minjagripur um hann, sem mætti prófa að selja á e-bay er fram líða stundir....

Liverpool sigraði Toulouse í Frakklandi

Peningaþvætti í Hlíðunum

Dagurinn í dag byrjaði ekki gæfulega, peningaveskið týnt og eigandinn hafði í fyrstu ekki minnstu hugmynd um hvar auðæfin væru niðurkomin. Sérlega óþægileg tilfinning, eins og að hafa misst ástvin. Ekki bara greiðslukortin heldur stimpilkortið, golfkortið, Liverpoolklúbb-kortið, gjafakort, tryggingakort og þannig mætti lengi telja. Til að koma í veg fyrir stórtjón var þeim kortum lokað sem hægt var að loka, á meðan dauðaleit stóð yfir. Hún bar lítinn árangur, eða þar til að lítill neisti kviknaði á hádegi.

Viti menn, blessað veskið hafði endað í þvottavélinni, í rassvasa á buxum sem fóru víst í hreinsun í gærkvöldi. Hvernig gat maður munað eftir því?! Ég viðurkenni hérmeð peningaþvætti, en vona að sleppa undan krumlum Halla Jó, Jóns HB og félaga. Kannski er þetta byrjunin á Alsheimer-light en mikið rosalega var ánægjulegt að sjá öll kortin aftur, hrein og fín, og lífið gat haldið áfram....

Fagnaðarefni

Eftir að hafa ekið nýlega um jósku heiðarnar í Danaveldi, og kynnst svona rifflum af eigin raun, er sérstakt ánægjuefni að Vegagerðin ætli að prófa sig áfram með þetta hér á landi. Á akstrinum í Danmörku svínvirkaði þetta á mann, amk í fyrsta sinn er ekið var yfir þessar línur. Manni dauðbrá, slíkur var hávaðinn, og viðbrögðin ætíð þau að bíllinn var réttur af hið snarasta. Engin spurning að þetta mun draga úr hættu á slysum, ekki síst hjá þreyttum og svefnlitlum ökumönnum. Áfram Vegagerðin! Einnig gaman að sjá G. Pétur Matthíasson á skjánum aftur, gamli og góði fréttamaðurinn kominn "hinum megin við borðið", og í grænu vesti í þokkabót.

Rannsókn gerð á vegrifflum

Draumadauðdagi

Hver hefur á móti því að lifa til 114 ára aldurs, og látast þá úr elli?! Það er mun gáfulegri endalok en verða td fyrir bíl. Annars ætlaði maður ekki að tjá sig um örlög annars fólks, en stóðst ekki freistinguna að þessu sinni. Auðvitað á ekki að gleðjast yfir óförum annarra en þessi frétt er svolítið "skemmtileg".

Elsta manneskja í heimi látin - úr elli

Þjónustuhlé í Þjóðvegamúlu-1

Þeir eru lúnknir laganna verðir í Húnaþingi og hafa fundið sér nýjan stað til að góma hraðskreiða ökuþóra, reyndar ekki á þjóðvegi 1 heldur í Laxárdal þar sem bílarnir bruna á beinum vegi niður af Þverárfjalli. En sýnileiki þeirra á vegunum og eftirlit er til mikillar fyrirmyndar. Mættur löggur annarra landshluta taka þá sér til fyrirmyndar. Ein besta slysaforvörnin er að þeir sjáist á vegunum, það dregur töluvert úr hraðanum.

Annars var maður að koma að norðan í gærkvöldi og þvílík umferð! Engu líkara en hálf þjóðan hafi verið fyrir norðan á Fiskideginum og stórum knattspyrnumótum á borð við Króksmótið á Sauðárkróki og Pæjumótið á Sigló, að ógleymdri Hólahátíð. Mestan part leiðarinnar var umferðin þolanleg, flestir á skikkanlegum hraða en á tímabili virtist sem Formúla-1 væri hafin, þegar allir ætluðu að fara að spæna framúr á beinu köflunum. Ég tel mig hins vegar hafa komist á leiðarenda á góðum tíma, þurfti bara að taka þrjú þjónustuhlé....!

ps. vegna tæknilegra örðugleika hefur bloggið verið stopult síðustu daga en tæknimenn á mbl.is eru að vinna í málinu

26 teknir fyrir hraðakstur á tveimur tímum

Hver röndóttur!

Hann sló Eirík Fjalar nærri því útaf laginu á Stuðmannatónleikunum um helgina, gesturinn sem átti svarið rétt á undan Eiríki við spurningu hans um hvað maðurinn hefði sagt við félaga sinn er þeir sáu zebrahestahjörð koma niður hlíðina: Hver röndóttur! (Nú væri nær að svara: KR-ingar að falla úr úrvalsdeild!)

Þessi uppákoma fékk mig til að rifja upp ógleðina við að sjá mitt gamla lið, Tindastól, leika í gul-svart röndóttum treyjum í Víkinni á dögunum gegn Berserkjum, sem ku vera varalið Víkinga. Veit ekki hvað hefur orðið af gömlu góðu rústrauðu búningunum. Enda fór svo að ég hrökklaðist af velli í stöðunni 2-0 og svo fór að Stólarnir töpuðu þessum leik 3-1, sínum fyrsta í sumar. Vonandi eru þetta algjörir varabúningar og eingöngu notaðir í neyð. Það sýnir sig líka í efstu deild að röndóttir búningar eru ekki að gera sig þetta árið, alveg sama þó að Vesturbæingar reyni að fá Loga til að kveikja neistann. Þeir hefðu betur haldið teiti, nei ég meina Teiti....