Riðill dauðans

D-riðill er sannkallaður dauðariðill, þetta verður bölvaður rembingur en eins og Liverpool hefur byrjað tímabilið þá hefst þetta á endanum. Allt eru þetta erfið lið heim að sækja og eiga eftir að gera Rauða hernum skráveifu. Vonandi fara mínir menn að hrökkva í gang, væntingar til liðsins eru gríðarlegar og við minnsta hikst verður æði heitt undir afturendanum á Rafa. Liðið virðist þurfa frekari styrkingar við, og ítreka ég það enn og aftur að maður sárlega saknar Crouch, hann er ekki að meika það með Portsmouth suður með sjó.

Riðlar Meistaradeildarinnar

Hversu oft verður þetta ,,hjúkket" ?

Sem gegnheill Púllari til ríflegra þrjátíu ára veit maður varla hvort maður á að gráta eða gleðjast eftir svona leik. Auðvitað átti liðið að vera búið að afgreiða þennan leik fyrir framlengingu en Kátur bjargaði heiðri liðsins og allra sem að því standa. Það hefði verið stórskandall og nánast ófyrirgefanlegt ef liðið hefði ekki komist áfram í Meistaradeildinni. En maður hefur alltaf borið fyllstu virðingu fyrir Standard Liege, frá því að Ásgeir Sigurvinsson var þar kóngurinn, og þetta lið kom manni á óvart, það verður að segjast. Vonandi verða þeir Belgíumeistarar í vetur!

Rauði herinn sér manni fyrir spennuleikjum, það verður ekki tekið af honum, og eins gott að vera ekki kominn á tungurótartöflur, þá væri skammturinn fyrir veturinn löngu búinn - og ekki enn kominn september!

Kuyt bjargaði Liverpool á örlagastundu

Gríðarlegt efni á ferð

Leitt að þeir Grétar Rafn og Heiðar komust ekki áfram með sínum liðum, en litlu munaði að annar Íslendingur, Aron Einar Gunnarsson, kæmist áfram með Coventry í framlengdum leik gegn Newcastle. Úrvalsdeildarliðið hafði betur en gaman var að fylgjast með Aroni. Þarna er gríðarlegt efni á ferð, sem á eftir að láta mikið að sér kveða í framtíðinni, sjáiði til. Eitilharður nagli, með ágæta boltatækni og getur tekið á harðasprett. Og innköstin, þvílíkur kraftur. Upp úr einu slíku náði Coventry að jafna og tryggja sér framlengingu. Vonandi að þessi drengur sleppi með meiðsli í þeim harða bolta sem spilaður er á Englandi, ekki síst í 1. deildinni.

Ef fleiri eintök af Aroni fara að sjást með íslenska landsliðinu þá gæti maður öðlast trú á þeim mannskap á ný. Kynslóðaskipti eru að eiga sér stað og vonandi ná hinir ungu atvinnumenn að springa út.

Bolton slegið út af 2. deildarliði

TAKK FYRIR OKKUR!

Til hamingju Ísland! Silfrið er í húsi, miklu miklu meira en við nokkurn tímann þorðum að vona. Við gleymum þessum tölum gegn Frökkum, þeir voru bara hungraðri. Verst var að þeir höfðu ekki fengið ólympíugull áður, voru greinilega ekki saddir þó að þeir væru heimsmeistarar. Maður hefur grátið og glaðst með drengjunum og þetta er búið að vera magnað. Önbilívebul.

Þjóðhátíðin heldur áfram til miðvikudags. Takk fyrir mig, takk fyrir okkur. Over and out...

Ísland í 2. sæti á ÓL

Fökking önbilívebul II

Það gengur allt upp í boltanum hjá mínum liðum, ef undan eru skildir Stólarnir sem eru í fallhættu í 2. deild!  Maður var tilbúinn með langa leiðindarullu um frammistöðu Liverpool á Anfield í dag, en þegar Carragher gamli jafnaði (líklegast sitt fyrsta á þessari öld) þá dró eitthvað úr barlóminum. Þegar svo Gerrard skoraði sigurmarkið á síðustu sekúndunum ætlaði allt um koll að keyra á heimilinu. Frábært mark og frábær þrjú stig. En torsótt voru þau maður, púff!

Okkar menn voru ekki alveg að gera sig fram að mörkunum, gegn sterku Boro-liði. Það virtist vera einhver landsleikjaþreyta í köppum á borð við Alonso, Gerrard, Bennajúnn og Babel. Robbie Keane er að koma til karlinn, já já. En mikið djöf... var þetta samt ánægjulegt í lokin, álíka magnað og sigurinn í handboltanum í gær. Veislan heldur áfram og svei mér ef við leggjum ekki Frakka á morgun. Hvernig sem fer erum við samt sigurvegarar á ÓL, stórasta land í heimi, besta litla þjóðin.

ps. Svo toppaði nú allt í dag að Arsenal var að tapa, fyrir Fulham. Hahahahahah.... Og kíkiði á stöðutöfluna, Liverpool trónir á toppnum. Já já

 

Gerrard tryggði Liverpool sigur

Segi það bara: Fökking önbilívebul

Leyfði mér í morgun að spá 32-31 sigri og stóru tapi ef tap yrði, leyfði mér þó aldrei að spá sex marka sigri og líklegast hefur enginn gert það nema strákarnir sjálfir. Algjörlega frábært, fökking önbilívebul.

Nú er það gullið næst, fróðlegt verður að sjá hvernig menningarnótt þróast, spurning hvort landinn fer nokkuð að sofa og heldur sér mjúkum fram að leik...

Íslendingar í úrslitaleikinn

Bestir sem rauðir

Snorri Steinn snarlega skaut

snilld er sú boltaþraut.

Í bláu' erum sauðir

en bestir sem rauðir

og berjumst þá eins og naut.

 

Þannig var það nú, skáldið hefur bara talað, og nú er þetta að renna upp. Svei mér ef við vinnum ekki Spánverja 32-31. En ef við töpum þá töpum við stórt. Skiptir samt engu, við mætum þá bara dýróðir á móti Króötum í bronsleiknum. ÁFRAM ÍSLAND

 

 

 

 

Ísland leikur í rauðu

Bullarar á blogginu

Bloggið er fyrir margar sakir magnað fyrirbæri, og getur verið skemmtilegt þegar vel er á haldið. Ég tók upp á þessu meira af gamni en alvöru, aðallega til að tjá tilfinningar um íþróttir eða spauga einhverja vitleysu. Svarta hliðin er þegar fólk fer að bulla með staðreyndir og tjá sig útfrá þeim. Gott dæmi um þetta er á bloggsíðu konu einnar í kvöld þar sem fullyrt er að eiginkona Gísla Marteins Baldurssonar sé formaður hverfaráðs Vesturbæjar og sú staða gerð tortryggileg í ljósi námsdvalar hjónanna í Skotlandi í vetur. Hnaut um þetta þar sem ég vissi vel hver kona Gísla er, hef unnið með þeirri mætu konu, og með ólíkindum hve fólk getur spunnið við svona vitleysu.

Eftirskrift: Fyndið, skömmu eftir að ég gerði athugasemdir við bloggfærsluna var hún tekin niður hið snarasta. Tengillinn að ofan vísar sennilega ekki lengur á bullið, en það má lesa það hér að neðan. Það er ekki einu sinni verið að biðjast afsökunar. En bloggfærslan gekk útá að segja að kona Gísla, Vala Ingimarsdóttir, væri orðin formaður hverfaráðs og í kjölfarið komu nokkrir bloggarar sem lýstu andúð sinni á málið með miklum gífuryrðum. Hið rétta er að kona Gísla er Vala Ágústa Káradóttir, svo það sé nú á hreinu.

"21.8.2008 | 21:29

Eiginkona Gísla Marteins formaður í hverfaráði.

Á vefi Reykjavíkurborgar kemur fram að eiginkona Gísla Marteins Baldursson, Vala Ingimarsdóttir er formaður hverfaráðs Vesturbæjar.Er það ekki sérkennileg stöðuveiting á eiginkonu sem ætlar að vera með manni sínum erlendis.  Finnst Hönnu Birnu það allt í lagi? Mér finnst það alls ekki í lagi."

Algjörlega óviðunandi

Miðað við knattleikni Asera áttum við að hafa sigur í þessum leik. Jafntefli er algjörlega óviðunandi við svona lið á heimavelli. Það vantaði "bara" tvö mörk upp á að spáin mín rættist og ekki komst Eiður Smári á blað. Hann átti sína spretti engu að síður og sýndi eins og oft áður að hann er eiginlega allt of góður fyrir þetta landslið, eins undarlega og það hljómar. Það vantaði amk oft góða meðspilara þegar hann var að reyna að skapa eitthvað. Skallamarkið hjá Grétari Rafni var gott og klaufalegt að Stefán markvörður missti aukaspyrnuna í netið. Hann átti að taka þetta skot, drengurinn. Annars er hann sláandi líkur Berg Ebba í Sprengjuhöllinni, en það er nú annað mál...

Þjálfarinn var að prófa nokkra "kjúklinga" í kvöld og þeir stóðu sig  flestir ágætlega. Jóhann Berg er sennilega okkar næsti "Eiður" ef allt gengur upp hjá pilti. Stefán markvörður er efnilegur en hann vantar enn einhverja snerpu. Bjóst við fleiri skiptingum, minnir að þær hafi bara verið tvær. Hélt að svona leiki ætti að nota til að prófa menn.

Heilt yfir virtist sem það vantaði einhverja stemningu í strákana og léttleika, menn mega ekki drepast úr leiðindum í þessu. Fýlan í aðstoðarþjálfaranum í hálfleik kom í gegnum skjáinn hjá manni og fyllti stofuna svo að það þurfti að loftræsta húsið...

Ísland gerði jafntefli við Aserbaídsjan

Brjósklosbætandi, svei mér þá

Svei mér ef sigurinn á Pólverjum í morgun hafi ekki farið langt með að lækna mig af bakverk eða brjósklosi sem hefur verið að hrjá karlinn síðustu vikurnar. Stebbi Lísu sjúkraþjálfari verður náttúrulega móðgaður að lesa þetta, að ég skuli ekki þakka batann í dag æfingunum sem hann tók mig í í fyrradag. Hef aldrei farið í sjúkraþjálfun áður en líklegast er þetta barasta allra meina bót. Skýringin með landsliðið er bara skemmtilegri, enda frábær leikur, og dagurinn þarf bara að enda á því að Ísland sigri Azerbadsjan í fótboltanum. Spái 3-1 sigri Íslands og Eiður með þrennnu, já já....