Bond syngjandi ABBA-lög!

Fór í bíó á fimmtudag með betri helmingnum á Mamma Mia, söngvamynd er byggir að samnefndum söngleik, þar sem ABBA-lögin eru sungin. Þetta ku vera konumynd, enda salurinn að mestu skipaður konum og saumaklúbbs og vinkonuhópar fyrirferðarmiklir.

En myndin er vel gerð og fyndin, og það allra fyndnasta er að sjá gamla góða Bond-leikarann, Pierce Brosnan, syngja ABBA-lög. Meiriháttar absúrd! Til allrar hamingju gera leikararnir sér grein fyrir að þetta sé fyrst og fremst syngjandi og dansandi grínmynd. Sönghæfileikarnir eru að vísu takmarkaðir, nema að Meryl Streep kemur á óvart á því sviði. Annars skilst mér að tölvutæknin sé orðin slík að hljóðverin geti búið til frábæra söngvara úr algjörlega laglausu og fölsku fólki.

Mæli samt með Mamma Mia, fyrir karla sem konur. Gallharðir Bond-aðdáendur gætu þó sjokkerast...

Athugasemdir

[Jens Guð, 13.7.2008 kl. 02:19]

  Kæri sveitungi (ég er frá Hrafnhólum í Hjaltadal),  má ég frekar biðja um Geirmund og karlakórinn Heimi.

[Björn Jóhann Björnsson, 13.7.2008 kl. 14:39]

Geiri og Heimir eru auðvitað bestir en kíktu á þessa, hún er þess virði. Alltaf gaman að hlægja í góðra kvenna hópi...