Skagfirskar ísbjarnasögur

Þær grassera víst ísbjarnasögurnar í minni gömlu heimabyggð, líklegast allar komnar frá Gróu gömlu því yfirvaldið yppir öxlum. Sú magnaðasta er að þriðji ísbjörninn hafi eftir allt saman verið felldur - í leyni. Eftir að Haddý og Hrefna tilkynntu um ísbjörninn sem þær sáu, eiga vaskar skyttur og löggur að hafa arkað á svæðið, rekist á bangsa og plaffað hann niður, og að því loknu grafið hann á staðnum! Þessi saga hljómar amk asskoti skemmtilega...

Önnur saga sem heyrðist var að tvær eldri konur áttu að hafa tilkynnt löggunni á Króknum að hafa séð ísbjörn á ferð sinni um héruð Skagafjarðar. Við eftirgrennslan mun þetta hafa verið bóndi á fjórhjóli í hvítum vinnugalla!

Nýlentur eftir dagsferð til Kulusuk á austurströnd Grænlands þar sem ekkert skorti á ísbjarnasögurnar. Eini munurinn frá þeim skagfirsku að þessar voru dagsannar, enda ísbirnir reglulegir gestir í mannabyggðum á þessum slóðum. Í Kulusuk er mönnum úthlutaður kvóti, veiðimennirnir mega skjóta 20 birni yfir veturinn. Síðan í vor sást til eins bangsa á vappi í þorpinu, er flestir íbúar voru í messu. Sáu þeir til bjarnarins út um kirkjugluggana og urðu bara að veifa honum, og bíða að hann færi aftur út á ísinn. Af hverju? Jú, kvótinn var búinn.....

Annars var þetta mögnuð ferð, manni var siglt frá Kulusuk upp að flugvellinum innan um íshröngl og jaka. Við stýrið á mótorbátnum var einn helsti veiðimaður þorpsins, drap sinn fyrsta ísbjörn aðeins 11 ára. Þetta er sko alvöru fólk.

Athugasemdir

[arnar valgeirsson, 10.7.2008 kl. 17:11]

já, þetta er alvöru fólk og magnað að vera þarna. er að fara í mína áttundu ferð bráðum, ásamt hópi fólks (ýmist einir sér eða í smærri hópum....).

koddu bara með og getur bara gert þessu góð skil... verð eitthvað með honum sigurði ísmanni sem kynnst hefur mörgum bangsanum.

[Björn Jóhann Björnsson, 13.7.2008 kl. 14:36]

þakka gott boð, Arnar, en ætli ég láti þessa ferð ekki duga í bili, er enn að jafna mig á moskítóflugnabiti...