Meitlaður Jónas - og mannlegur

Minn gamli lærifaðir á því sem ég kalla "gamla" DV, Jónas Kristjánsson, skrifar meitlaða pistla á vef sínum, jonas.is. Hárbeitt ádeila á allt og alla, á Fróni sem í fjarlægum heimi. Stóru orðin sjaldan spöruð. Ekki er maður alltaf sammála karlinum, en lesningin óneitanlega hressandi. Inni á milli sýnir hann á sér mannlegu hliðina, og hefur húmor fyrir sjálfum sér, samanber skrifin hér að neðan frá því á föstudaginn 9. maí. Pistlar er ekki rétta orðið yfir skrifin, þau ná ekki þeim lengdum, nær að tala um skeyti eða mola. Halda mætti að hann skrifaði í síðusnið (template) eins og við á Mogganum, skeytin aldrei lengri en 9-10 línur, orðin um og yfir 100 talsins, og engar málalengingar. Formfastur er hann, skeytin yfirleitt 4-5 á dag. Knappur, klár, enda Skagfirðingur að stórum hluta!

 

-------

Tvíheppinn á einum degi
Var í morgun búinn að bíða á biðstofu í kortér eftir hálftíma meðferð í sjúkraþjálfun. Sá næsti á eftir mér var kominn. Í hroka mínum stóð ég upp og gekk út. Í útidyrunum sá ég trukk bakka inn í hliðina á bílnum mínum. Náði númerinu, fékk tjónaskýrslu og slepp skaðlaust. Var í gær búinn að kaupa nýjan bíl, þann stærsta og dýrasta á ævinni. Vegna fjarvistar manns fæ ég hann ekki afhentan fyrr en eftir helgi. Var því enn á gamla bílnum. Þannig var ég ekki á nýja bílnum í morgun og sá tjónið gerast. Er hægt að vera meira heppinn en tvöfalt á einum og sama deginum?
(heimild: jonas.is)

Frí frá enska boltanum

Jæja, þá er enski boltinn búinn og maður veit satt að segja ekki  hvað tekur við. EM í sumar og England ekki með. Undarlegur andskoti. Tímabil mikilla væntinga og vonbrigða er að baki hjá mínum mönnum í Liverpool. Engir titlar í húsi. Fátt til að gleðjast yfir nema markamaskínan Torres og snillingurinn Gerrard. Vonandi verða þeir áfram í okkar herbúðum, og svo virðist sem Benitez muni þjálfa áfram þó að maður hefði ekkert haft á móti skiptingu. Það er næsta víst að krafa um titil verður öskrandi hávær næsta vetur, og það er einnig næsta víst að nú verður stefnan tekin á Anfield. Kominn tími til að fara til Mekka, áður en maður fer á elliheimili eða að þeir rífi niður Anfield.

Hér til hliðar er komin ný könnun, um hverjir verða Íslandsmeistarar í knattspyrnu. Tippa á að þessi fjögur lið verði í toppbaráttunni, Skaginn gæti blandað sér þarna í hópinn en þeir komast ekki að hjá mér af persónulegum ástæðum. Í fyrri könnun varð endirinn sá að Man Utd var spáð Englandsmeistaratitli, sem varð raunin á síðustu stundu. Óþolandi að horfa upp á þetta lið vinna trekk í trekk, vonandi fer Ferguson að hætta og þá hrynur veldið...

Þóra átti tilburði kvöldsins

Sem búsettur Reykvíkingur (semsagt ekki innfæddur) harma ég að sjálfsögðu ósigur míns liðs en ætli megi ekki segja að tapið sé táknrænt fyrir ástandið í borginni um þessar mundir, á meðan Kópavogi gengur allt í haginn.

Tilburði kvöldsins átti hins vegar Þóra Arnórsdóttir í lok þáttarins þegar hún líklega plataði alla þjóðina í nokkur sekúndubrot, með því að taka um kviðinn og beygja sig, ólétt konan á síðustu dögum meðgöngu. Sá amk ekki betur en að samstarfsmaður hennar, Sigmar, varð stjarfur um stund. Skemmtilegur endir á skemmtilegum þætti, en það hefur svo sannarlega ræst úr Útsvarinu, tók sinn tíma að komast af stað fyrst í vetur og ná flugi en verður áreiðanlega aftur á dagskrá næsta vetur.

Hið vaska reykvíska lið var óheppið í lokin, og eftirá má segja að þau hefðu átt að taka 15 stiga spurningu frekar en 10 þarna í miðjunni. Og 5 stiga spurningin sem Kópavogur valdi sér var þung, amk þótti mér það en hér á þessu heimili kom svarið hjá betri helmningnum á svipstundu: Kremkex! Hafði hreinlega hvorki ímyndunarafl né þekkingu til að vita að það hefði verið kallað Sæmundur á sparifötunum. Alltaf kemur það betur og betur í ljós hve lítið maður veit - og hve vel maður er giftur....

ps. Talandi um Kópavog þá heyrði ég einn ágætan í dag. Það er víst búið að þýða hvað Gunnar Birgisson sagði nákvæmlega þegar hann sagði: Það er gott að búa í Kópavogi. Leikið á réttum hraða þá mun hann víst hafa sagt: Það er gott á þig að búa í Kópavogi...

 

 

Kópavogur vann Útsvar

Þetta er víst búið...

Hvað getur maður sagt? Eiginlega ekkert. Hinir bláu voru bara betri, einfalt mál, þó að Torres hafi skorað þá var hann vart svipur hjá sjón og Gerrard verið öflugri. Og hvar var Crouch?! Við máttum hins vegar alveg fá víti þegar Hyppia var felldur. En draumurinn er úti, þessi Moskvudraumur á dögunum hefur þá verið fyrir einhverju allt öðru. Kannski maður eigi eftir að flytjast til Moskvu...

Chelsea í úrslit í fyrsta sinn eftir 3:2 sigur á Liverpool

Sviðsett myndefni

Kemur ekki á óvart að Gasmaðurinn sé orðinn vinsæll, þó að hann hafi síst viljað það sjálfur. Ýmislegt má segja um framgöngu lögreglunnar við Rauðavatn á dögunum, og í raun allra sem þar áttu hlut að máli. Undarleg múgæsing átti sér stað og fjölmiðlamenn fylgdust að sjálfsögðu vel með. Heldur sterk finnst mér viðbrögðin hjá Láru Ómarsdóttur að segja upp störfum en hún stendur sterkari eftir, sem og fréttastofan. Hún verður fljótlega komin á fjölmiðil á ný. Ef ekki á Vísi.is eða Fréttablaðinu þá einhvers staðar annars staðar.

Fréttaefni getur auðveldlega orðið sviðsett sem slíkt og þá einkum myndefni,  þegar t.d. ljósmyndarar stilla upp fólki á mynd eða gera eitthvað til að gæða myndefnið lífi. En alvöru fréttaviðburði, einkum átök og slys, þurfa ljósmyndarar ekki að sviðsetja.

Stundum þarf þó að gera eitthvað til að kalla fram myndefnið. Fræg er sagan af Sveini heitnum Þormóðs er hann hafði lengi reynt að sitja fyrir hinum heimskunna grínara, Jerry Seinfeld, í Íslandsheimsókn sinni um árið. Seinfeld hafði verið fýldur í heimsókninni og ekki viljað tala við hérlenda fjölmiðla eða sitja fyrir á myndum hjá þeim. Þegar Seinfeld var að koma útaf Hótel Sögu, og rétt áður en hann steig upp í limmósínu, kallaði Svenni til hans af góðu færi: Mister Seinfeld, my wife loves you.  Seinfeld sneri sér við og brosti er hann sá til Sveins, sem að sjálfsögðu náði brosinu á mynd áður en grínarinnn uppgötvaði að þessi óvænti aðdáandi var blaðaljósmyndari!

En hin meinta ætlan Láru Ómarsdóttur um sviðsetningu á eggjakasti fölnar í samanburði við þetta ágæta myndbrot af YouTube sem einn ágætur vinnufélagi rakst á:

http://www.youtube.com/watch?v=9hL_DyvEV84

 

Rétt aðferð við beitingu piparúða

Stingandi sárt - en ekki búið

Ekki er nú risið hátt á Jóni Árna, blessuðum, hann á vökunótt framundan og martraðir. En svona er þetta bara þó sárt sé - stingandi sárt. Leikurinn í raun búinn, komnar einhverjar sekúndur fram yfir uppbótartíma, og Anfield farið að kyrja You''ll never walk alone. Svo ein sending fyrir og Jón Árni hefur vonandi hugsað sem var að maðurinn fyrir aftan hann gæti skorað og því ætlað að skalla yfir. Á Players voru menn farnir að syngja líka og stappa í gólf og borð þegar áfallið dundi yfir. Þvílíkt svekkelsi.

En þetta er ekki búið, langt því frá, aðeins hálfleikur og nú er bara að skora á Stamford Bridge. Maður var sláandi nálægt að spá rétt um úrslitin í kvöld, aðeins ef Torres hefði nú hrokkið í gang - og Jón Árni ekki komið inn á....

 

Riise skoraði sjálfsmark og tryggði Chelsea jafntefli

Hann hefur húmor, karlinn

"Ég kem aftan að honum og klappa honum á vinstri öxlina og ef hann lítur við án þess að finna til þá er hann klár."

Hefði ég fengið þessa setningu í krossaprófi, og fengið möguleika á að haka við Rafael Benitez, þá hefði mér aldrei dottið sá möguleiki í hug. Hér sýnir hinn spænski hugsuður á sér nýja og skemmtilega hlið, mætti nú brosa meira á bekknum, en hvað um það, hann hefur verið að standa sig vel síðustu mánuðina. Ánægjulega að vita að Gerrard verði með, ekki veitir af í þessum risaslag. Mínir menn verða að komast í seinni leikinn með gott forskot og því leyfi ég mér að spá 2-0, Torres og Gerrard pota tuðrunni inn. Og vonandi stígur Drogba á nagla er hann fer fram úr rúminu, maður gjörsamlega fær grænar bólur á að sjá honum bregða fyrir...

Gerrard verður með Liverpool annað kvöld

Meistaradeildin er málið

Auðvitað á Benitez að hvíla lykilmenn fyrir átökin gegn Chelsea eftir helgi, þessi leikur gegn Fulham skiptir engu máli, enda meistaradeildarsætið fyrir næsta tímabil svo gott sem tryggt. Það þýðir ekkert fyrir botnliðið að vera að væla, hver er sinnar gæfu smiður eins og Benitez segir, sá mikli hugsuður.

Eitthvað hafa Arsenal-menn verið að kvarta undan síðustu myndbirtingu hér á síðunni, og til mótvægis kemur hér ein ágæt sem sýnir að menn verða að hafa húmor fyrir sjálfum sér...

Benítez ætlar ekki með sterkasta liðið gegn Fulham

Smá salt í sárin...

Rakst fyrir tilviljun á þessar myndir, sem einhver góður maður hafði dundað sér við að búa til. Þær eiga að lýsa raunum Arsenal-manna að undanförnu, og segja meira en mörg orð...

Arsenal í augsýn

Hélt að þessi staða kæmi ekki upp en nú er jafnvel möguleiki á að velta Arsenal úr sessi í þriðja sætinu, bara fimm stig í Liverpool í fjórða sætinu eftir sætan sigur á Blackburn í dag. Meira að segja Wenger er búinn að játa sig sigraðan í baráttunni um Englandsmeistaratitilinn. Fjórar umferðir eftir og allt getur gerst fyrir okkur Púllara.

Djúpt var á mörkunum í Anfield gegn þrautleiðinlegu liði Blackburn, og hefðu þau ekki litið dagsins ljós hefði Whiley dómari því miður orðið maður leiksins. Engu líkara en hann hafi vaknað ósofinn í morgun með þessum orðum: "Í dag mun Liverpool ekki fá vítaspyrnu hjá mér, sama þótt Gerrard verði felldur þrisvar í teignum." En sem betur lét Gerrard þetta ekki á sig fá, fór algjörum hamförum í sínum 300. deildarleik, skoraði eitt magnað mark og lagði upp annað fyrir Torres. Með þessa tvo í ham, og hina funheita, verðum við Evrópumeistarar!

Benítez: Vissi að við myndum skora