Sagði ykkur það!

Jæja, loksins íslenskur sigur og hvað sem líður einu sláarskoti þeirra Norður-Írsku þá áttum við þetta fyllilega skilið. Og ég sagði ykkur það, reyndar skeikaði einu marki hjá Íslendingum, en við megum ekki glata trúnni. Hún getur flutt fjöll. Til hamingju Jolli og aðrir kringum landsliðshópinn, þið eruð langbestir!

Guðjóni Þórðarsyni verður ekki að ósk sinni í bili, hann er ekki að verða landsliðsþjálfari. Jolli hefur löngu sýnt og sannað að hann er á réttum stað. Hann og Bjarni hafa barið hópinn saman, vel studdir af frábærum stuðningsmönnum í stúkunum. Svona á stemningin að vera kringum landsliðið og ánægjulegt að heyra hve Eiður Smári var jarðbundinn og yfirvegaður eftir leikinn. Hann má þó passa sig inni á vellinum, að hreyta ekki ónotum í sína leikfélaga þó að þeim skriki eitthvað fótur. Það var liðsheildin sem skóp sigurinn í kvöld, ekki einstakir leikmenn. Þvílíkur kraftur í Gunnari Heiðari, hann á skilið að vera þarna fremstur og langskynsamlegast að hafa Eið Smára á miðjunni. Þar nýtast hans hæfileikar best í landsliðinu, og svo tel ég best að Hermann Hreiðars sé áfram fyrirliði, það tekur ákveðna pressu af Eiði.

ps. ég hef enga samúð með Keith Gillespie, hef aldrei þolað leikmanninn, enda lék hann með United. Hefði hann ekki verið þarna, hefði Eiður Smári smellt tuðrunni inn fyrir línuna.

Ísland sigraði Norður-Írland 2:1

Nafnar mínir í norðri

Sannarlega ekki hlýleg tilhugsun ef nafnar mínir í norðri eru að týna tölunni svona hratt. Mér varð hugsað til ungu húnanna tveggja á myndinni á Moggavefnum og framtíðar þeirra á ísilögðu hjarninu, en birnir standa saman í blíðu og stríðu, hvar í heimi sem þeir lifa og hrærast:

Lofthiti lækkar ei meir,

lífið á jörðinni deyr.

Norpa þeir kaldir

í norðrinu kvaldir

nafnarnir mínir tveir.

Spá fækkun ísbjarna um 2/3 fyrir miðja öldina

Vonandi leggst Gaui Þórðar á koddann með góða samvisku

Frábær leikur hjá strákunum og magnað að fara af velli svekktur með jafntefli. Ísland átti skilið að sigra og við vorum klaufar að skora ekki fleiri mörk. Þetta er allt á réttri leið hjá Jolla og engin spurning að við munum leggja Norður-Íra að velli á miðvikuadaginn. Sennilega rétt að gefa Eiði Smára frí þar til hann hefur náð sér að fullu. Sem Púllara var leitt að sjá framkomuna hjá Alonso, þessum annars dagfarsprúða pilti og kannski eins gott að Torres var tekinn af velli. Alltof miklir vælukjóar þessir spænsku sparkverjar.

En einn er sá maður sem að mínu mati skammast sín eftir daginn og það er Guðjón Þórðarson. Að láta hafa sig útí drottningarviðtal á leikdegi og hrauna yfir landsliðið, þjálfarann og KSÍ er með ólíkindum og í besta falli algjört dómgreindarleysi. Og síðan étur Stöð 2 upp úr þessu viðtali fram að leik. Áður hafði hann kvartað undan því að Bjarni sonur sinn væri ekki í landsliðinu! Come on!

Ennþá er Guðjón að stæra sig af sínum árangri með landsliðið, hann gerði vissulega fína hluti en það var fyrir tíu árum þegar landsliðið var þéttara og allt önnur staða uppi í alþjóðaboltanum. Nú eru mun fleiri þjóðir farnar að gera sig gildandi á þessum vettvangi. Hvaða árangri hefur Guðjón náð síðan sem þjálfari? Hrökklast heim frá Englandi og kominn aftur heim á Skagann. Heldur maðurinn virkilega að hann geti vælt sig og bullað aftur inn sem landsliðsþjálfari? Ég ætla rétt að vona að KSÍ ráði hann ekki aftur.

Við getum verið stolt af strákunum í kvöld, þeir sýndu og sönnuðu að þeir geta náð langt gegn sterkum þjóðum - og það án Eiðs Smára og Brynjars Björns. Við þurfum að byggja upp jákvæðari og uppbyggilegri anda í kringum liðið. Sá andi sveif yfir Laugardalnum í kvöld (og honum rigndi niður líka) og með þetta veganesti er ástæða til að hlakka til næsta leiks gegn N-Írum.

ÁFRAM ÍSLAND!!!

ps. Hvað skyldi nú bullukollurinn Henry Birgir á Fréttablaðinu skrifa um þennan leik?! Ef það er ekki búið að reka hann frá því að skrifa um landsliðið, gaurinn sem krafðist þess að Jolli yrði rekinn...

Íslendingar og Spánverjar skildu jafnir, 1:1

"Geggjað slöpp í ensku"

Eftirfarandi barst mér í pósti, og hefur eflaust farið víða, en þetta er bara svo fyndið að ég verð að deila því með fleirum. Sýnir meira en mörg orð hvað skrifin í netheimum geta verið skrautleg.

Sagan mun hafa byrjað þannig að kona sem var að skrifa á vefnum barnaland.is bað um hjálp við að skrifa orðið "virðingarfyllst" á ensku en hún var þá að skrifa eitthvað bréf. Konan þurfti á aðstoð að halda og skrifaði eftirfarandi:

"Hvernig segir maður "kær kveðja" ...... á ensku sorrý er ekki klár í henni og er að senda út til uk vegna gallaða dótsins."

Síðan fékk hún svar frá hjálpsömum netverja og skrifaði til baka:

"Ókei takk æðislega ég er geggjað slöpp í ensku sérstaklega að skrifa hana getiði sagt mér án þess að drulla yfir mig hvort að það sé hægt að skilja eitthvað af þessu bréfi hehe?"

Síðan birti hún þetta ágæta bréf:

"Hello. i am from Iceland and I don not speak very good English but I am gun a tray. I by a toy in Iceland from fisher price ,,little people,, and dora explorer and this toy are maid in China 2002-2007. One Dora explorer vas bay in Spain and made 2002 (the small one) and the big one I think in Iceland but I am not sure made 2003.

Are something wrong this toy or????? Waht can I do?? Can I talk to some body in Iceland so I can anther stand this better????

I hope you can anther stand what I am writing. And thank you

Respectfully .

 XXXXX."

Einhverjum sem las þetta á Barnalandi mun hafa þótt þetta fyndið og gripið til þess ráðs að þýða bréf konunnar nokkurn veginn orðrétt. Útkoman var þessi:

"Halló, Ég er frá Íslandi og ég er mafíuforingi sem talar ekki mjög góða ensku, en ég er byssa á bakka. Ég er hjá leikfangi á Íslandi frá Fisher Price, litla fólk og Dóra landkönnuður og þetta leikfang er þjónustustúlka í Kína á árunum 2002-2007. Ein Dóra landkönnuður var strönd á Spáni og náði 2002 (sú litla) og um þá stóru hugsa ég á Íslandi en er ekki viss um að hafi náð 2003.

Eru eitthvað að þessu leikfangi eða????? Get ég talað við eitthvað lík á Íslandi svo ég geti anther staðið þetta betur?????

Ég vona að þú getir anther staðið það sem ég skrifa, og takk fyrir.

Virðingarfyllst."

Þetta getur maður náttúrulega ekki toppað...!

Friðargæsla á stjórnarheimilinu?

Skyldi þessi hershöfðingi frá NATO hafa talað af fúlustu alvöru er hann lýsti yfir vonbrigðum með að Ísland ætlaði að kalla friðargæslulið sitt heim frá Írak? Þetta er einn aumingjans maður! Sennilega vildi hershöfðinginn ekki móðga þessa litlu eyþjóð norður í ballarhafi sem reynir að gera sig gildandi í alþjóðasamfélaginu.

Annars er þessi ákvörðun utanríkisráðherra dálítið sérkennileg og tæpast hægt að kalla táknræna, var ekki bara hægt að finna friðargæsluliðanum önnur verkefni sem voru ráðherra þóknanleg? Var ekki bílstjóradjobb á lausu? Eitthvað kostar það að fá blessaðan manninn heim. Skil vel undrun forsætisráðherrans, það skyldi þó ekki vera að ófriður magnaðist á stjórnarheimilinu, og verkefni gætu skapast fyrir friðargæsluliðann hér heima fyrir?!

Enn og aftur kom alþýðuskáldið upp í mér, þetta bara flæðir fram endalaust:

Mæla þau tungum tveim,

tæpast ég skil í þeim.

Úti er friður,

öryggisliður

einmanna sendur heim.

Geir: Hefði ekki kallað starfsmanninn heim

Of vel gert til að hneykslast

Honum Jóni Gnarr og félögum hefur tekist að gera þessa auglýsingu það vel, að það er hreinlega frekar erfitt fyrir kirkjunnar menn að standa á hornum úti og fordæma verknaðinn. Útfærslan er það vel og faglega úr garði gerð, að húmorinn yfirgnæfir ekki heilagleikann. Auglýsingin mun líka skapa þarfa umræðu um kristna trú og hvernig nútímamaðurinn á að umgangast hið heilaga orð. Þarf ekki nefnilega að fara nýjar leiðir til að ná til fólks og hrista upp í því, án þess að brjóta einhver boðorð?

Hef alltaf átt erfitt með taka Jón Gnarr alvarlega, þegar hann er ekki "í persónu", en hann komst td ágætlega frá Kastljósþættinum í kvöld í viðræðu við Halldór Reynisson. Ég hygg að þegar frá líður eigi þau á Biskupsstofu eftir að sjá ljósið, og uppgötva að þessi auglýsing er ekkert annað en snilld. Eitthvað hefur nú dæmið kostað, og nokkra lúðra og viðurkenningar á hún eftir að sópa að sér. Spurning hvað Gnarrinn dregur næst upp úr hattinum, því áreiðanlega hafa verið búnar til fleiri útgáfur.

Annars er tæknin farin að bíta í skottið á okkur með þessari þriðjukynslóðartækni. Viljum við alltaf vera í mynd er við tölum í símann? Viljum við láta elta okkur út um allt? Hvar endar þetta með friðhelgi einkalífsins? Viljum við allar þessar eftirlitsmyndavélar? Viljum við allar þessar hraðamyndavélar? Viljum við sérsveitina hangandi yfir okkur á pöbbaröltinu? Ég bara spyr, en er nú kominn eitthvað út yfir efnið....

Biskup segir nýja auglýsingu Símans smekklausa

Þingmaður þungur á brá...

Athyglisvert skjal sem Bjarni hefur grafið þarna upp, og kallar á einhver svör í þessari makalausu endaleysu kringum þennan ryðdall. Ekki síður athyglisvert var að sjá útganginn á þingmanninum í sjónvarpsfréttum, og engu líkara en hann hafi verið á gangi í miðbæ Reykjavíkur og fengið einn á trantinn. Þá datt manni í hug:

Þingmaður þungur á brá,

þekktari fyrir að spauga.

Barinn og bólginn að sjá,

Bjarni með glóðarauga....

 

 

Yfirdráttur vegna Grímseyjarferju

Baa ba ba bla

Sannarlega samgleðst maður Reyknesbæingum og öðrum Suðurnesjamönnum með Ljósanótt, og vonandi skemmta allir sér hið besta, en mikið svakalega er maður búinn að fá leið á þessu Ljósalagi, sem dunið hefur yfir mann í útvarpinu daginn út og inn. "Ó Keflavík" og "baa ba ba ba" glymur í hausnum á manni á koddanum á kvöldið, mér liggur við að segja.  Svosem ágætis lag hjá Jóhanni Helgasyni, en hefði mátt spara það og setja ekki í loftið svona snemma. Lagið hefur gert það að verkum að allur áhugi á að fara á Ljósanótt hefur fokið út um veður og vind. Því miður er maður farinn að tala um Ljótalagið...

Hins vegar svolítið skondið að heyra af einhverri gremju í Njarðvíkingum yfir textanum. Íslenskur hrepparígur eins og hann gerist bestur, nema að þetta hafi verið trikk til að auglýsa upp hátíðina.

Ljósanótt hafin í Reykjanesbæ

Þá losnar stæði fyrir bílinn minn...

Það er eftirsjá af Þóru Kristínu á Stöð 2, hún er röggsamur, áræðinn og faglegur fréttamaður. Spái því að hún verði fljótlega komin aftur á RÚV, og Óðinn Jónssonn áreiðanlega þegar búinn að hringja. Annars las ég eftir henni haft að hún hefði gert vænan starfslokasamning og það er vel. Nú þarf Steingrímur að sýna og sanna að hann sé trúverðugur fréttastjóri og láti fortíð sína í forsætisráðuneytinu ekki trufla störf sín. Skil áhyggjur Þóru í þessa veru, en vil að lokum vera svolítið leiðinlegur og fagna því að eitt stæði við Bólstaðarhlíðina er að losna!. Starfsmenn 365 hafa ekki úr mörgum bílastæðum að moða og Þóra meðal þeirra sem fundið hafa sér stað í næstu götu. Þetta kemur á besta tíma fyrir mig því það var verið að bæta við bíl á heimilið .....!!

Þóru Kristínu sagt upp á Stöð 2