Of vel gert til að hneykslast

Honum Jóni Gnarr og félögum hefur tekist að gera þessa auglýsingu það vel, að það er hreinlega frekar erfitt fyrir kirkjunnar menn að standa á hornum úti og fordæma verknaðinn. Útfærslan er það vel og faglega úr garði gerð, að húmorinn yfirgnæfir ekki heilagleikann. Auglýsingin mun líka skapa þarfa umræðu um kristna trú og hvernig nútímamaðurinn á að umgangast hið heilaga orð. Þarf ekki nefnilega að fara nýjar leiðir til að ná til fólks og hrista upp í því, án þess að brjóta einhver boðorð?

Hef alltaf átt erfitt með taka Jón Gnarr alvarlega, þegar hann er ekki "í persónu", en hann komst td ágætlega frá Kastljósþættinum í kvöld í viðræðu við Halldór Reynisson. Ég hygg að þegar frá líður eigi þau á Biskupsstofu eftir að sjá ljósið, og uppgötva að þessi auglýsing er ekkert annað en snilld. Eitthvað hefur nú dæmið kostað, og nokkra lúðra og viðurkenningar á hún eftir að sópa að sér. Spurning hvað Gnarrinn dregur næst upp úr hattinum, því áreiðanlega hafa verið búnar til fleiri útgáfur.

Annars er tæknin farin að bíta í skottið á okkur með þessari þriðjukynslóðartækni. Viljum við alltaf vera í mynd er við tölum í símann? Viljum við láta elta okkur út um allt? Hvar endar þetta með friðhelgi einkalífsins? Viljum við allar þessar eftirlitsmyndavélar? Viljum við allar þessar hraðamyndavélar? Viljum við sérsveitina hangandi yfir okkur á pöbbaröltinu? Ég bara spyr, en er nú kominn eitthvað út yfir efnið....

Biskup segir nýja auglýsingu Símans smekklausa

Athugasemdir

[arnar valgeirsson, 5.9.2007 kl. 01:30]

get ekki svarað þessu öllu félagi. hins vegar sammála með þessa auglýsingu. eitthvað hafa þeir velt sér yfir þessu hugsa ég og látið svo vaða...

en hún er flott gerð og skemmtileg en einhverjir fá nú í punginn yfir þessu, eins og komið hefur í ljós.

verði ljós...

[Björn Jóhann (IP-tala skráð) 5.9.2007 kl. 12:08]

Vafalaust hafa einhverjir fengið í punginn, en verði þeim af því...

Eflaust var tilgangur auglýsingarinnar að ná athygli, sem hefur tekist, og eflaust gat Biskupsstofa ekki brugðist öðru vísi við, þó að vissulega hefði verið gaman að sjá Karl fagna auglýsingunni.

Svo manstu Arnar að halda með L-liðinu í úrvalsdeild...

[arnar valgeirsson, 6.9.2007 kl. 00:23]

ja, Leeds er úrvalsdeildarlið, hvað sem hver segir....

hafa reyndar unnið fjóra í röð, þarna í sinni deild en samt með mínus þrjú.

ósanngjarnt helvedde.