Magnað lokatafl

Mikið er maður feginn að útfararfarsanum kringum Bobby Fischer sé lokið. Líkt og við skákborðið átti Fischer óvæntan lokaleik, hann virðist hafa verið búinn að finna sína hinstu hvílu.  Lítil og falleg kirkja í rólegu umhverfi, svo óvæntur og snöggur var lokaleikurinn að sóknarpresturinn kom af fjöllum. Lék skáksnillingurinn um leið á "andstæðinga" sína eða öllu heldur svonefnda stuðningsmenn sem virðist ekki hafa haft grænan grun um hvernig Fischer vildi ljúka sinni hinstu för. Maður setur ákveðna spurningu við framgöngu stuðningshópsins síðustu daga og í hve góðu, eða öllu heldur slæmu sambandi hann hefur verið við Fischer og hans nánustu. Líkt og hvernig Fischer fékk að vera í friði síðustu ævidagana á Íslandi þá átti að sjálfsögðu að veita honum frið að honum látnum og ekkert var meira við hæfi en útför í kyrrþey.

Hins vegar er ljóst að Laugardælakirkjugarður í Flóa verður ekki jafn rólegur og kyrrlátur og hingað til. Þangað mun á næstu árum fjöldi fólks heimsækja leiði skákmeistarans, og vissara fyrir sóknarnefndina að fara að huga að því, sé hún ekki þegar búin að kalla saman fund.

Fischer jarðsettur í kyrrþey

Athugasemdir

[Páll Rúnar Pálsson (IP-tala skráð) 21.1.2008 kl. 22:04]

Ég er nú nokkuð viss um að það hafi verið hluti af plottinu hjá kallinum og stuðningsmönnum hans, þ.e. láta alla missa sig yfir Þingvallahugmyndinni og dreifa þannig athyglinni á meðan sá gamli laumaðist austur í Flóa án þess að nokkrum dytti sá leikur í hug?

Hann átti sannarlega síðasta leik í sínu lífstafli.