Bloggfærslur mánaðarins, ágúst 2007

Sýnd veiði, ekki gefin

Þó að þessi dráttur fyrir okkar menn í Liverpool líti vel út á pappírnum skulum við ekki fagna sigri of snemma. Þetta eru allt ágætis knattspyrnulið, sem erfitt er heim að sækja, ekki síst Besiktas þar sem blóð rennur fram af vörum manna. En drátturinn hefði getað verið verri, og þetta er aðeins fyrsta skrefið á toppinn í vor, þegar Rauði herinn tekur við dollunni. Mark my word!!
mbl.is United og Roma mætast aftur - Chelsea og Valencia einnig
Tilkynna um óviðeigandi tengingu við frétt

Dónaskapur í símaskránni!

Var bent á magnaðan hlut í símaskránni á netinu, www.ja.is, þegar smellt er á kort af landinu. Sláiði inn heimilisfangið Fífuhvammsvegur eða Smáratorg, og sjáiði hvað blasir við. Hafði reyndar oft séð áður hvernig viðkomandi mannvirki getur litið út frá vissum sjónarhornum, en þessi útgáfa var yndislega skýr og greinileg á götukortinu af Kópavogi. Já, það er upp á þeim risið þarna í Kópavogi, ekki furða þó að Goldfinger hafi verið lokað....

Með tárvot augu

Þetta var aldrei spurning, okkar menn með algjöra yfirburði allan tímann og hvílík vinnsla í þeim félögum í framlínunni Crouch og Kuyt. (Hvort segir maður Kát, Kuít eða Kút...?) Gaman að sjá hve nýju mennirnir eru að koma vel út, ég segi enn og aftur að við eigum eftir að hirða margar dollur í vetur, sjáiði til. Leikurinn í kvöld sýndi líka vel hve leikmannahópurinn er breiður. Þarna vantaði kappa eins og Gerrard, Carragher, Torres, Alonso og Voronin.

Það var tekið hraustlega undir í stofunni fyrir og eftir leik og sungið með You'll never walk alone, og minningarstundin fyrir leik um unga strákinn frá Liverpool, og aðdáanda Everton, fékk mann til að vökna um augun. Hjartnæm stund og greinilega margir harðjaxlar í stúkunni sem brustu í grát, enda þetta morð ekkert annað en hryllingur.


mbl.is Stórsigur hjá Liverpool
Tilkynna um óviðeigandi tengingu við frétt

Næstum því ekki nóg

Næstum því er ekki nóg, myndi einhver segja, og sannarlega óþægilegt að vita af þessum blessaða manni einhvers staðar í felum að undirbúa fleiri hryðjuverkaárásir. Flaug mér þá í hug eftirfarandi:

Þeir náð' onum næstum því

Newsweek það stendur í.

Ósóm' á Hlöðum,

á ókunnum stöðum,

undirbýr sprengjugný.


mbl.is Bandaríkjamenn náðu næstum bin Laden árið 2004
Tilkynna um óviðeigandi tengingu við frétt

Hver er eiginlega ráðgjafi Strætó?

Nú hefur Strætó bs tekið í notkun enn eitt leiðakerfið. Vetraráætlun hefur tekið við af sumaráætlun og ferðum á að hafa verið fjölgað. Ekki á það við um leið 5, sem heldur áfram að ganga á hálftímafresti á meðan flestar leiðir ganga á kortersfresti. Það er ofboðslega sniðugt þegar þú þarft t.d. að taka leið 6 úr mið- og austurborginni til að ná fimmunni í Ártúninu. Þá er vissara að hafa valið rétta tímann, til að þurfa ekki að bíða í korter, líkt og ég lenti í fyrir helgi. Það tók mann hátt í 40 mín að komast úr Hlíðunum í Hádegismóana. Þetta er bara klikkun, ekkert annað.

Svo hefur einhverjum snillingi dottið í hug að breyta vefnum hjá Strætó með þeim afleiðingum að lengri tíma tekur að kynna sér leiðakerfið. Búin hafa verið til pdf-skjöl fyrir hverja leið, sem þú þarft að smella á og eins gott að hafa aflmikla tölvu. Ég hef engan áhuga á að prenta þessi leiðakerfi út heldur vil nota vefinn til að sjá þetta með aðgengilegum og skjótum hætti.

Nú er orðið frítt í strætó fyrir námsmenn og húrra fyrir því. En er ekki verið að brjóta einhver mannréttindi á öðrum farþegum sem þurfa að greiða fyrir þessa þjónustu? Hvað skyldu lögspakir menn segja um það? Nú er um almenningssamgöngutæki að ræða. Ég hef amk varla lengur geð í mér að nota þessa þjónustu og stutt í að keyptur verði annar bíll á heimilið....


Ítreka fyrri spá um Voronin

Sérlega ánægjuleg úrslit fyrir okkar menn, þó að á tímabili var farið að fara um mann í sófanum í seinni hálfleik er Sunderland gerði sig líklegt til að jafna. En úkraínski boltinn Voronin (minnir mig á einhvern Hollywood-leikara, man bara ekki hvern) sýndi og sannaði að hann á heima í byrjunarliðinu.  Ítreka bara mín fyrri orð um að þessi kappi á eftir að blómstra í herbúðum Liverpool. Einn galla, ef galla skyldi kalla, má nefna, þ.e. að hann er stundum ekki nógu eigingjarn, hann hefði td í einu tilviki mátt vaða sjálfur að markinu og skjóta í stað þess að leita Torres uppi. Sá spænski piltur á líka eftir að reynast gulls ígildi, þvílík knattmeðferð og hraði.

Og Carragher maður! Þegar sá nagli kveinkar sér þá er eitthvað að, ekki nema von að Benitez hafi ekki trúað að hann vildi fara útáf!

Áfram Liverpool.... við hirðum dolluna í Englandi í ár, sjáiði til !


mbl.is Verðskuldaður sigur hjá Liverpool
Tilkynna um óviðeigandi tengingu við frétt

Varið ykkur á myndavélunum

Smá framhald af "stóra sektarmálinu". Gerði njósn hjá innheimtustöð sekta á Blönduósi, og þar fá stúlkurnar margar hringingar frá svekktum ökumönnum eins og mér, sem fá háar sektir úr þessum myndavélum fyrir að slefa yfir 90 km hraða. Annars góðhjörtuð símastúlka sýndi því mikinn skilning að svekkjandi væri að fá sekt fyrir sama hraða og lögreglubílar væru ekki að stöðva fyrir. Ég mun krefjast sönnunargagna!

En variði ykkur bara á þessum myndavélum í Melasveitinni, ekki langt frá afleggjarnum inn Hvalfjörðinn. Þær eru ofvirkar...


Rísa þeir upp frá dauðum...

Við að lesa þessa ágætu frétt, og heyra hvernig hinn röggsami lögreglustjóri ætlar að taka á ómenningunni í miðborginni um helgar, þá datt mér nú eftirfarandi limra í hug:

Bjarga á svörtum sauðum,

sullandi ungum kauðum.

Á rassinum niðri

í Reykjavík miðri,

rísa þeir upp frá dauðum...


mbl.is Áfengisdauðum verði sinnt í miðborginni
Tilkynna um óviðeigandi tengingu við frétt

Mældur úr launsátri!

Þokkalegt bréf sem beið manns í póstinum í dag, nokkurra þúsunda króna sekt frá löggunni á Snæfellsnesi fyrir meintan hraðakstur í Hvalfjarðarsveit í síðustu viku. Á að hafa verið mældur á 96 km hraða, þar sem leyfilegur hámarkshraði er 90 km. Rekur ekki minni til að hafa mætt lögreglubíl á þeim slóðum, og hvað þá að vera stöðvaður, og mun krefja embættið svara! Einn vinnufélagi minn fullyrðir að búið sé að setja þarna upp hraðamyndavél, og ef svo er þá er hún þokkalega vel falin. Ef ég man rétt var umferðin þarna töluverð og á jöfnum hraða, og hafi maður verið mældur af myndavél, þá er ekki mikið samræmi milli slíkra tækja og "lifandi" lögregluþjóna sem eru ekki að hafa fyrir því að stöðva menn og sekta fyrir að vera á innan við 100 km hraða við góðar aðstæður. Í sömu ferð mætti ég amk tveimur lögreglubílum á svipuðum hraða sem ekki svo mikið sem blikkuðu á mann. Nær væri að elta uppi ökuníðingana sem vaða framúr heilu bílalestunum á 120-140 km hraða, og láta sig litlu varða þó blindhæðir séu framundan.

Þetta er óréttlæti sem verður mótmælt!


Innistæðulítil vegabréf

Var á faraldsfæti um helgina (sem fyrr í sumar og dekkin á Skódanum farin að finna fyrir því). Eitt af því sem hefur verið meðferðis, að kröfu krakkanna, eru vegabréf frá N1 og stimpilkort frá Olís, kallað Ævintýraeyjan. Allt til að safna einhverjum smá vinningum, sælgæti og smáhlutum. Um leið græða olíufélögin á manni með gylliboðum sem ætlað er að lokka börnin á bensínstöðvarnar. Ævintýraeyjan var efst á vinsældalistanum fyrr í sumar, og fljótt var búið að fylla út nógu mörg kort til að allir fengju eitthvað fyrir sinn snúð. Síðan tóku við vegabréf frá N1, en erfiðlega hefur gengið að safna stimplum á þau kort. Vinningarnir hafa oftar en ekki verið uppurnir og starfsfólkið klórað sér í höfðinu yfir því hvað gera ætti í stöðunni. Í veitingaskálanum í Brú kvartaði starfsstúlka undan því að þau fengju svo lítið af þessum vinningum, ,,að ég veit ekki hvað þessir menn eru að hugsa" eins og hún orðaði það með pirring í röddinni.

Á mínum bær hefur það amk verið niðurstaðan hjá krökkunum að Ævintýraeyja Olís hafi verið miklu betri en Vegabréfin hjá N1, vörurnar voru þó til og vinningarnir voru fleiri og meira í þá lagt. Verst er þó að láta þessa ísmeygilegu markaðssetningu ná tökum á fjölskyldunni. Á meðan hækka félögin bara bensínverðið með bros á vör....


Næsta síða »

Höfundur

Björn Jóhann Björnsson
Björn Jóhann Björnsson

Höfundur er kotroskinn og kærulaus Króksari að uppruna.

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Heimsóknir

Flettingar

  • Í dag (28.3.): 0
  • Sl. sólarhring:
  • Sl. viku: 129
  • Frá upphafi: 0

Annað

  • Innlit í dag: 0
  • Innlit sl. viku: 129
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Nýjustu myndböndin

Fögnuður úr böndum

Innskráning

Ath. Vinsamlegast kveikið á Javascript til að hefja innskráningu.

Hafðu samband