Hvað er góður knattspyrnumaður?

Glæsilegur árangur hjá Hermanni og félögum og ástæða til að samfagna sérstaklega með Eyjamanninum knáa. Frábær karakter og leikmaður inni á velli, og að mér skilst utan vallar líka. Hef líklega ekki séð hann berum augum síðan á Hótel Íslandi fyrir um 10 árum er hann steig stríðsdans uppi á borðum í sigurgleði eftir jafntefli á móti Frökkum á Laugardalsvellinum!

En þessi frétt fær mann til að hugsa um annað, þ.e. val á 10 bestu knattspyrnumönnum þjóðarinnar sem Stöð 2/Sýn stóð fyrir og gera á þætti um í sumar. Hermann Hreiðarsson er ekki í þeim hópi og heldur ekki Eyjólfur Sverrisson, en báðir geta þeir nú státað af meistaratitli með sínum félögum í atvinnumennskunni og einkar farsælum ferli með landsliðinu og sínum liðum. Þess ber að geta að þeir félagar voru í hópi 20 knattspyrnumanna sem sérstök dómnefnd á vegum Stöðvar 2 valdi, áður en val á 10 bestu var sett í val almennings, ef ég skil þetta fyrirkomulag rétt. Mat á því hver er bestur í einhverju er ætíð afar huglægt, og ekki allir á sömu skoðun í þeim efnum. En maður skyldi ætla að val á bestu knattspyrnumönnunum fari einnig eftir þeim árangri sem þeir ná með liðum sínum. Á löngum og farsælum atvinnumannsferli náði Eyjólfur tveimur meistaratitlum og var fyrstur Íslendinga til að leika í Meistardeild Evrópu.

Knattspyrna er ekki einstaklingsíþrótt, hún er hópíþrótt og þetta gleymist iðulega þegar kemur að vali á því hver er "bestur". Þegar litið er yfir lista Stöðvar 2 yfir þá 10 bestu, sé ég fljótt að Eyjólfur og Hermann ættu hiklaust að vera þar, alveg eins og t.d. Pétur Pétursson, Rúnar Kristinsson eða Sigurður Jónsson. Fótbolti snýst ekki eingöngu um knattleikni og markaskorun, hún snýst um svo margt margt annað. En þetta hefur á endanum sjálfsagt verið vinsældakosning meðal almennings og atvinnumenn sem komið hafa utan af landi, líkt og Eyjólfur og Hermann, hafa átt brattann að sækja hjá áhangendum "stóru" félaganna í borginni. Þannig er það nú bara. Því miður.

Hermann enskur bikarmeistari

Athugasemdir

[Rúnar Birgir Gíslason, 17.5.2008 kl. 18:47]

Ég hef einmitt verið að hugsa um þetta val, það er t.d. enginn markvörður þarna.

Árni Gautur vann marga titla erlendis og lék í meistaradeildinni.

Mér er reyndar sagt að til séu betri markverðir í sögunni, ég er bara svo ungur

[arnar valgeirsson, 17.5.2008 kl. 20:59]

jamm, erfitt að velja tíu af mörgum. eyjólfur á að vera þarna og sennilega hemmi líka.

hann fellur bara svo oft sko....

en þú sást hann samt fyrir nokkrum árum í eyjum. var að árita boli og svona á shellmótinu.

ertu farinn að kalka maður??

[Björn Jóhann (IP-tala skráð) 17.5.2008 kl. 21:14]

Auðvitað Arnar, hvernig læt ég! Hér sannast kölkunin, þetta er þeim mun undarlegra í ljósi þess að á Shellmótinu var ég allsgáður en á Hótel Íslandi fyrir tíu árum var því svo fjarri farið....