Merkilegur bisnes á Vogi - Frábær forsíða Blaðsins

Merkilegt hvað kollegar mínir eru duglegir að draga Þórarinn Tyrfingsson á Vogi fram í sviðsljósið þegar löggan kemst yfir mikið magn fíkniefna. Skyldi hann kannski hringja sjálfur? Þórarinn er jafnan beðinn að verðmeta haldlögð fíkniefni, hann ku jú vera með gjaldskrána fyrir framan sig, og síðan spurður um framboð og eftirspurn á markaðnum. Ekki laust við að það hlakki í kallinum yfir ástandinu, því minna framboð því meiri líkur á að dópistarnir sjái að sér og fari í meðferð. Meiri bisnes fyrir Vog.

Sannarlega ánægjulegt að löggan skuli hafa stoppað þessa skútu í Fáskrúðsfirði, frábærlega að verki staðið þar og fagmannlega, en hvað kemur það yfirlækni SÁÁ við?

Mögnuð forsíða 

Það ber hins vegar að hrósa Blaðinu sérstaklega fyrir forsíðu þess á föstudaginn um fíkniefnafundinn í Fáskrúðsfirði. Með því flottara sem sést hefur á forsíðu íslensks dagblaðs í langan tíma. Óli Steph er á hárréttri línu með þetta blað, sem gjörsamlega bakaði forsíðu Fréttablaðsins þennan dag.

 

Athugasemdir

[Benna, 22.9.2007 kl. 15:41]

Finnst bara vera skömm af þessari færslu þinni að gefa í skyn að það hlakki í  Þórarni yfir þessum fíkniefnafundi af því þá streymi kannski til hans fleiri fíklar?

Get alveg lofað þér því að svo er ekki enda sér varla högg á vatni þó svona mikið af fíkniefnum hafi náðst enda mikið fleiri en þessir aðilar að flytja inn.

Þórarinn er einn af fáum sem hefur alltaf verið til staðar fyrir mig, hann hjálpaði mér oft og iðulega þegar enginn annar vildi það eða gat. Ég hringdi meira að segja í hans einkanúmer til að fá hjálp og hann brást ekki illur við eins og margur annar læknir hefði gert heldur rétti mér ávallt hjálparhönd!
Hann veit bara mjög mikið um heim fíkniefnanna meira en margur annar svo það er mjög eðlilegt að fjölmiðlar vilji fá hans álit á þessu máli enda vita þeir að þar er maður á ferð sem veit um hvað hann er að tala.

Hvað ert þú að gera til að hjálpa öðrum?